Президент Қасым-Жомарт Тоқаев екі қуатты жер сілкінісі салдарынан жүздеген адам қаза тауып, мыңдаған адам жарақат алған Венесуэла президентінің міндетін атқарушы Делси Родригес көңіл айту жеделхатын жолдады.
ЖЕДЕЛХАТТА НЕ ДЕЛІНГЕН
Қасым-Жомарт Тоқаев табиғи апат салдарына байланысты Венесуэла басшылығы мен халқына қолдау білдірді.
«Осы қиын сәтте, орны толмас қайғының ауыртпалығын бөлісіп, Сізге, жақындарынан айырылған отбасыларға, сондай-ақ бүкіл достық Венесуэла халқына көңіл айтамын», — делінген жеделхатта.
Президент сондай-ақ зардап шеккендердің тез сауығып кетуін, ал қайтыс болғандардың отбасыларына табандылық пен рухтың беріктігін тіледі.
НЕ БОЛДЫ
24 маусымда Венесуэлада бір минут аралықпен екі күшті жер сілкінісі болды. АҚШ Геологиялық қызметінің мәліметі бойынша, бірінші жер асты дүмпуінің магнитудасы 7,1, екіншісінікі — 7,5 құрады.
Бірінші жер сілкінісінің ошағы Морон қаласының батысында, Каракастан шамамен 168 км қашықтықта, 13 км тереңдікте орналасқан. Екінші дүмпу 10 км тереңдікте болды, ал оның ошағы Мороннан оңтүстік-батысқа қарай 16 км жерде орналасты.
Апаттан қаза тапқандардың ықтимал саны 10 мыңнан 100 мың адамға дейін жетуі мүмкін екені атап өтіледі.
ЖЕР СІЛКІНІСІНІҢ САЛДАРЫ
CNN соңғы деректері бойынша, қаза тапқандар саны 235 адамға жетті, тағы 4,3 мың адам жарақат алды.
Каракаста ғимараттар құлағаны хабарланды. Көптеген адамдар әлі де хабар-ошсыз жоғалған немесе үйінділер астында қалған, құтқару жұмыстары жалғасуда.
Болған жер сілкіністері Венесуэлада жүз жылдан астам уақыт ішіндегі ең күштілердің бірі болды.
