Щучинскте жеке үйдегі өртте қарт ерлі-зайыптылар қаза тапты. Алдын ала мәліметтер бойынша, 39 жастағы жергілікті тұрғын өрт қоюға күдікті.
НЕ БЕЛГІЛІ
Tengrinews.kz мәліметінше, өрт 29 қыркүйекке қараған түні Ақмола облысының Щучинск қаласында болған. Өрт ауданы 90 шаршы метрді құрады.
Ақмола облысының төтенше жағдайлар департаментінің (ТЖД) ақпараты бойынша, оқиға орнына келген өрт сөндірушілер өртті сөндірді. Сөндіру кезінде олар үйден ер мен әйелдің денелерін тауып, сыртқа шығарды.
Өрттің себебі анықталуда.
ПОЛИЦИЯ НЕ ДЕДІ
Ақмола облысының полиция департаментінің (ПД) мәліметінше, болған оқиға фактісі бойынша сотқа дейінгі тергеп-тексеру басталды.
Полицияның алдын ала нұсқасы бойынша, өрт қоюға 39 жастағы жергілікті тұрғын қатысты. Өрт салдарынан үйде тұрған ерлі-зайыптылар қаза тапты.
Күдікті ұсталып, уақытша ұстау изоляторына (УҰИ) қамалды.
