В Абай облысында мемлекетке қайтарылған қаражат есебінен қаржыландырылатын 26 әлеуметтік жобаны іске асыру жалғасуда. Жобалардың жалпы құны 50 млрд теңгеден асады.
ПАЙДАЛАНУҒА ҚАНДАЙ НЫСАНДАР БЕРІЛДІ
Абай облысы прокуратурасының деректері бойынша, негізгі нысандардың бірі Семейдегі Арнайы әлеуметтік қызметтер көрсету орталығының жаңа корпусы болды. Құрылыс құны 2,6 млрд теңгені құрады. Ғимарат пайдалануға берілгеннен кейін психоневрологиялық аурулары бар адамдарға арналған орын тапшылығы жойылып, арнайы әлеуметтік қызметтер алу кезегі айтарлықтай қысқарды.
Аягөз ауданында құны 250 млн теңге болатын магнитті-резонанстық томография (МРТ) аппаратын орналастыруға арналған қосымша ғимараттың құрылысы аяқталды. Жаңа диагностикалық кешен облыстың бірнеше ауданының тұрғындарына жоғары технологиялық медициналық көмекке қолжетімділікті қамтамасыз етеді.
ҚАНДАЙ БІЛІМ БЕРУ НЫСАНДАРЫ САЛЫНДЫ
Семейде 1 500 орынға есептелген, құны 7,6 млрд теңге болатын заманауи Оқушылар сарайы салынды. Балалар үшін спортпен, жүзумен, робототехникамен, авиамодельдеумен, IT-технологиялармен және қосымша білім берудің басқа да бағыттарымен айналысуға жағдай жасалған.
Қазіргі уақытта Оқушылар сарайына қауіпсіз кіру жолдары мен жаяу жүргіншілер инфрақұрылымын қамтамасыз ету мәселесі пысықталуда, себебі нысан айналма автомобиль жолының жанында орналасқан.
ӨҢІРДЕ ҚАНША ЖОБА ІСКЕ АСЫРЫЛУДА
Абай облысы прокуратурасының хабарлауынша, өңірде барлығы мемлекетке қайтарылған активтер есебінен қаржыландырылатын, жалпы құны 50 млрд теңгеден асатын 26 әлеуметтік жоба іске асырылуда.
Қалған әлеуметтік маңызы бар нысандардың құрылыс барысы мен уақтылы іске асырылуы ведомствоның тұрақты бақылауында.
