В Қазақстанда суррогат аналық қызметін көрсету ережелері өзгерді. Енді мұндай қызметтің тапсырыс берушілері тек некеде тұрған ҚР азаматтары бола алады.
ҚАНДАЙ ӨЗГЕРІСТЕР КҮШІНЕ ЕНДІ
Zakon.kz деректері бойынша, 2026 жылғы 14 шілдеде Мемлекет басшысы Қасым-Жомарт Тоқаев «Қазақстан Республикасының кейбір заңнамалық актілеріне мемлекеттік басқару және жергілікті өзін-өзі басқару мәселелері бойынша өзгерістер мен толықтырулар енгізу туралы» Заңға қол қойды. Құжат, атап айтқанда, «Неке (ерлі-зайыптылық) және отбасы туралы» Кодексті суррогат аналық туралы жаңа нормамен толықтырды.
Өзгерістерге сәйкес, суррогат аналық қызметінің тапсырыс берушілері тек некеде тұрған ерлі-зайыптылар — ҚР азаматтары бола алады.
ЕРЛІ-ЗАЙЫПТЫЛАРҒА ҚАНДАЙ МІНДЕТТЕР ЖҮКТЕЛЕДІ
Заңмен тапсырыс беруші ерлі-зайыптылар суррогат ананың медициналық тексеруден өтуіне және қосалқы репродуктивті әдістер мен технологияларды қолдануына байланысты материалдық шығындарды көтеруге міндетті екендігі белгіленді.
Сонымен қатар, олар медициналық ұйымға өздерінің физикалық және психикалық денсаулығы туралы медициналық қорытындыны, сондай-ақ медициналық-генетикалық тексеру нәтижелерін ұсынуға тиіс.
Сондай-ақ тапсырыс берушілерге суррогат ананың жүктілік, босану кезеңінде және босанғаннан кейін 56 күн ішінде медициналық қызмет көрсету ақысын төлеу міндеті жүктеледі. Егер жүктілік немесе босану асқынулармен өтсе, шығыстар босанғаннан кейін 70 күн ішінде төленеді.
ЖАҢА ЕРЕЖЕЛЕР ҚАШАН ҚОЛДАНЫЛА БАСТАЙДЫ
Заң жекелеген нормаларды қоспағанда, 2026 жылғы 26 шілдеден бастап күшіне енгізіледі.
