Атырау облысының қылмыстық істер жөніндегі мамандандырылған ауданаралық соты терт адамнан тұратын отбасын өлтіру ісі бойынша Сұлтан Сәрсемәлиевті кінәлі деп танып, оған өмір бойы бас бостандығынан айыру жазасын тағайындады. Сондай-ақ сот сотталғанды жәбірленуші тарапқа моральдық зиянды өтеу ретінде 40 млн теңге төлеуге міндеттеді.
СОТ ҚАНДАЙ ШЕШІМ ШЫҒАРДЫ
Сот Сұлтан Сәрсемәлиевті төрт адамды өлтіруде, сондай-ақ алаяқтықта, ұрлықта, мал ұрлауда, көлік құралын заңсыз иеленуде және құжаттарды жасыруда кінәлі деп таныды.
Сот оған өмір бойы бас бостандығынан айыру жазасын тағайындады. Сотталған жазасын ерекше қауіпсіздіктегі қылмыстық-атқару жүйесі мекемесінде өтейтін болады.
Сонымен қатар, сот оны жәбірленуші тарапқа моральдық зиянды өтеу ретінде 40 млн теңге төлеуге міндеттеді.
Сотталғанның өзі үкімді түсінгенін мәлімдеді.
ІС ҚАЛАЙ ДАМЫДЫ
2025 жылдың аяғында Атырау облысында бір отбасының төрт мүшесі із-түзсіз жоғалды. 2026 жылдың басында олардың денелері Қызылқоға ауданынан табылды.
2026 жылдың ақпан айының аяғында іздеу жарияланған Сұлтан Сәрсемәлиев және оның бұрынғы әйелі Ақбаян Мұқанғалиева Индонезияда ұсталып, кейін Қазақстанға экстрадицияланды.
Сот процесі кезінде Сәрсемәлиев қылмысқа бұрынғы әйелінің туыстарымен болған жанжалдар себеп болғанын мәлімдеді.
ІС БОЙЫНША ТАҒЫ НЕ БЕЛГІЛІ
Сондай-ақ сот қылмыс жасағаннан кейін Сәрсемәлиевтің қаза тапқандарға тиесілі малды сатқаны, олардың банк карталарынан ақша алғаны, қайтыс болғандардың атына жалпы сомасы шамамен 4 млн теңге кредит рәсімдегені, сондай-ақ олардың атынан зейнетақы алғаны анықталды деп тапты.
Ақбаян Мұқанғалиға қатысты қылмыстық іс тоқтатылды. Іс материалдарында прокуратура оның қылмысты жасыруға қатысқанын дәлелдей алмағаны көрсетілген. Сондай-ақ әйелдің психиатриялық сараптамадан өткені хабарланды.
