«Семей орманы» мемлекеттік орман табиғи резерватының аумағында Абай облысы Бородулиха ауданында тағы да орман өрті болды. Өртті сөндіруге 250-ден астам адам, авиация және ондаған техника жұмылдырылды, ал жақын жердегі «DosbolLike» балалар лагерінен 190 бала эвакуацияланды.
НЕ БОЛДЫ
Экология және табиғи ресурстар министрлігінің мәліметінше, өрт «Семей орманы» мемлекеттік орман табиғи резерваты Бородулиха филиалының Камышенка орманшылығының 57-ші тоқсанында тіркелген.
Өртті жоюға 86 мемлекеттік орман қорғау қызметкері, 38 төтенше жағдайлар министрлігінің (ТЖМ) қызметкері, 101 полиция қызметкері, сондай-ақ ТЖМ, қорғаныс министрлігі және «Қазавиаорманқорғау» РМҚК авиациясы жұмылдырылды. Тікұшақтар 24 рет су шашу жүргізді, оқиға орнына қосымша күш пен техника жіберілуде. Өртті оқшаулау жұмыстары жалғасуда.
ҚАУІПСІЗДІК ҚАЛАЙ ҚАМТАМАСЫЗ ЕТІЛУДЕ
Абай облысы полиция департаментінің (ПД) мәліметінше, өрт туралы хабарлама түскеннен кейін полиция қызметкерлері өрт аймағына жақын орналасқан «DosbolLike» балалар лагеріне барып, 190 бала мен 20 қызметкерді эвакуациялауды ұйымдастырды.
Полиция балаларды үрей туғызбау үшін ұйымдасқан түрде шығарғанын хабарлады. Ең кішкентай балаларды қызметкерлер қауіпсіз жерге дейін қолдарында алып жүрді. Абай облысы төтенше жағдайлар департаментінің (ТЖД) ақпараты бойынша, екі баланы ата-анасы алды, қалғандары Бородулиха ауылына эвакуацияланды.
Қазіргі уақытта қауіпті аумақ қоршалып, кіреберіс жолдар бөгде көліктер үшін жабылған. Полицейлер өрт сөндіру техникасының кедергісіз өтуін қамтамасыз етіп, жедел қызметтер колонналарын алып жүріп, жол қозғалысын реттейді.
ӨРТТІ СӨНДІРУДІ НЕ ҚИЫНДАТАДЫ
Экология министрлігінің ақпараты бойынша, өрт ауданында өрт қауіптілігінің бесінші сыныбы сақталуда. Ауа температурасы +34 градусқа жетеді, солтүстік-батыс желдің жылдамдығы 4 м/с, екпіні 8 м/с-ге дейін жетеді.
Айта кету керек, «Семей орманындағы» орман өрті еліміздің басқа өңірлеріндегі күрделі өрт жағдайы аясында дамып жатыр. ТЖМ мәліметінше, Ақмола облысында өрт сөндірушілер Степногорск ауданында, сондай-ақ Байқоныс, Бестөбе, Изобильное, Бөгенбай және Селеты ауылдарының маңындағы құрғақ өсімдіктердің өртін жойды. Ведомствоның ақпараты бойынша, бұл өрттердің себебі найзағай соғуы болған.
КОНТЕКСТ
Қазіргі өрт 2023 жылғы маусымда ең ірі орман өрті болған «Семей орманы» мемлекеттік орман табиғи резерватында орын алды. Ресми мәліметтер бойынша, сонда резерваттың 14 қызметкері қаза тауып, өрт ауданы 60 мың га-дан асқан еді.
Кейін Абай облысы Бородулиха аудандық соты резерваттың және Жаңа Шүлбі филиалының екі бұрынғы басшысын кінәлі деп таныды. Сот мәліметінше, олар өртті сөндіруді ұйымдастыру бойынша өздеріне жүктелген міндеттерді орындамаған, жағдайды дұрыс бағаламаған және жұмыстарды жүргізу кезінде қауіпсіздік талаптарының сақталуын қамтамасыз етпеген. Әрқайсысы 7 жыл бас бостандығынан айыру жазасына кесілді.
Осы оқиғалардан кейін орман қызметтерінің өрт қауіпті маусымға дайындығы мәселесі Үкімет деңгейінде бірнеше рет көтерілді. Тексерулердің бірінің қорытындысы бойынша Экология министрлігі «Семей орманы» резерватын қоса алғанда, бірқатар мемлекеттік орман иелерінің дайындығы жеткіліксіз екенін хабарлады. Анықталған проблемалардың арасында өртке қарсы жабдықтардың, байланыс құралдарының, арнайы техниканың және жанар-жағар май материалдары қорының жетіспеушілігі аталды.
Бұған дейін 2026 жылғы 30 сәуірде Орталық коммуникациялар қызметіндегі (ОКҚ) баспасөз мәслихатында ФБРК құрылтайшысы және журналист Кирилл Павлов орман шаруашылығы және жануарлар дүниесі комитеті өкілдерінен 2023 жылғы өрттен кейін «Семей орманын» қалпына келтіруге қанша уақыт кететінін тікелей сұрады. Жауап ретінде комитет төрағасының міндетін атқарушы Мақсат Елемесов жол картасы 2035 жылға дейін есептелгенін, алайда орманды бұрынғы қалпына келтіру шамамен 60 жылды алатынын хабарлады.
