Ішкі істер министрлігінің (ІІМ) Тергеу департаменті 2026 жылдың басынан бері тергеушілердің ұсынуы бойынша 2000-нан астам лауазымды тұлға тәртіптік жауапкершілікке тартылғанын, ал 500-ден астам адам қылмыс жасауға ықпал еткен себептер мен жағдайларды жою шараларын қабылдамағаны үшін әкімшілік тәртіппен жазаланғанын хабарлады.
ТЕРГЕУШІЛЕРДІҢ ҰСЫНУЫ БОЙЫНША ҚАНДАЙ ШАРАЛАР ҚАБЫЛДАНДЫ
Polisia.kz мәліметінше, жыл басынан бері тергеушілер ҚР ҚПК-нің 200-бабына сәйкес мемлекеттік органдарға, мекемелер мен ұйымдарға шамамен 45 мың ұсыну енгізген.
Осы ұсынуларды қарау қорытындысы бойынша 2000-нан астам лауазымды тұлға тәртіптік жауапкершілікке тартылды. Сонымен қатар, ұсынуларды қарау шараларын қабылдамағаны үшін 500-ден астам адам әкімшілік жауапкершілікке тартылды.
ІІМ Тергеу департаментінің бастығы Самат Аисовтың айтуынша, оларды қарау қорытындысы бойынша қоғамдық қауіпсіздікті нығайту шаралары қабылданды. Атап айтқанда, әлеуметтік жағынан қолайсыз аудандарда, сауда нысандарында және ойын-сауық мекемелерінде қосымша шамамен 2 мың бейнебақылау камерасы орнатылды. Жолдардың 155 авариялық-қауіпті учаскесінде инфрақұрылым жақсартылды, ал 56 нысанда қауіпсіздік шаралары күшейтіліп, күзет жүйелері жаңғыртылды. Сонымен қатар, білім беру мекемелерінде 60-тан астам профилактикалық іс-шара өткізілді.
ІІМ ҚАНДАЙ МЫСАЛДАР КЕЛТІРДІ
ІІМ ақпараты бойынша, қайталап қылмыс жасаған шартты түрде сотталған сегіз адам жазасын өтеу үшін бас бостандығынан айыру орындарына жіберілді. Сондай-ақ, заңсыз қызметтің төрт субъектісінің қызметі тоқтатылып, 15 мейрамхана мен түнгі клубтың жұмыс уақыты шектелді.
Ведомство мысал ретінде 2026 жылғы қаңтарда болған бұзақылық фактісін тергеуден кейін Павлодардағы лаунж-барлардың бірінің қызметін тоқтата тұруды келтірді.
Қарағанды облысындағы Ақсу-Аюлы – Балқаш автомобиль жолында жолаушылар автобусының өртенуі, салдарынан кәмелетке толмаған бала қайтыс болған оқиғаны тергеуден кейін тергеушінің ұсынуы бойынша жолаушылар автобустарына толық тексеру жүргізілді. Оның қорытындысы бойынша 199 жүргізуші мен автобус иесі әкімшілік жауапкершілікке тартылды, оның ішінде 55 адам — тиісті рұқсатсыз салондарды жатқын орындарға қайта жабдықтағаны үшін.
ЗАРДАП ШЕККЕНДЕРГЕ ЗАЛАЛ ҚАЛАЙ ӨТЕЛЕДІ
Самат Аисовтың айтуынша, аяқталған қылмыстық істер бойынша залал 72 млрд теңгеден астамды құрады, оның 34 млрд теңгеден астамы өтелуін қамтамасыз етілді.
Астанада 111 зардап шегушіге қатысты 140 млн теңгеден астам залал келтірілген интернет-алаяқтық туралы қылмыстық іс бойынша, ІІМ мәліметінше, залалдың толық өтелуі қамтамасыз етілді.
Залалдың өтелуін қамтамасыз ету үшін жалпы құны 29 млрд теңгеден астам мүлікке тыйым салынды. Атап айтқанда, Алматы облысында алаяқтық туралы қылмыстық іс бойынша екі ЖШС-нің мүлкіне, оның ішінде жалпы құны 7 млрд теңгеден астам 28 жылжымайтын мүлік объектісіне тыйым салынды.
Сондай-ақ, ІІМ хабарлағандай, Зардап шеккендерге өтемақы төлеу қоры арқылы 5 мыңнан астам зардап шегушіге 831 млн теңгеден астам сомаға төлемдер жүргізілді. Өтемақы алу құқығы қылмыстың 124 құрамы бойынша көзделген, ал төлемдер мөлшері 30-дан 50 АЕК-ке дейін құрайды.
БОЛАШАҚ ТЕРГЕУШІЛЕРДІ ҚАЛАЙ ДАЙЫНДАЙДЫ
2019 жылдан бастап заң факультеттерінің студенттерін дуальды оқыту бағдарламасы жүзеге асырылуда. Бүгінгі күні жоғары оқу орындарымен ынтымақтастық туралы 40 меморандум жасалды, 1524 студентті біріктіретін 47 студенттік клуб жұмыс істейді. Диплом алғаннан кейін 100-ден астам түлек ішкі істер органдарына жұмысқа орналасуды жоспарлап отыр.
