2 шілдеде Астана қаласындағы «Сығанақ» және «Бәйтерек» станциялары аралығында кабельдің тұтануы орын алды. Оқиға салдарынан LRT пойыздарының қозғалысы уақытша тоқтатылып, өрт сөндіріліп, инфрақұрылым тексерілгеннен кейін ол толығымен қалпына келтірілді.
НЕ БОЛДЫ
City Transportation Systems (CTS) мәліметінше, кабельдің тұтануы «Сығанақ» және «Бәйтерек» станциялары аралығында орын алған. Жолаушылардың қауіпсіздігін қамтамасыз ету үшін пойыздар қозғалысы уақытша тоқтатылды.
Өрт сөндірілгеннен кейін мамандар инфрақұрылымның жай-күйін тексеріп, пайдалану қауіпсіздігін растады. Содан кейін пойыздар қозғалысы толық көлемде қайта жандандырылды. Жүйе штаттық режимде жұмыс істейді.
ТЖМ НЕ ХАБАРЛАДЫ
Төтенше жағдайлар министрлігінің (ТЖМ) хабарлауынша, электр қуаты өшірілгеннен кейін құтқарушылар Vario Carbon автономды рюкзактік өрт сөндіргішінің көмегімен 1 погондық метр аумақтағы өртті сөндірді.
ЗАРДАП ШЕККЕНДЕР БАР МА
CTS ақпаратына сәйкес, оқиға салдарынан зардап шеккендер жоқ. Инфрақұрылымның жай-күйі тексерілгеннен кейін пойыздар қозғалысы толық көлемде қалпына келтірілді.
