Қырғызстаннан келген, Астанада алмасу бағдарламасы бойынша оқитын екі студент қыз Кенесары хан туралы онлайн-эфирде айтқан сөздеріне байланысты резонанстан кейін кешірім сұрады. Қыздар қазақ халқын кемсітуді немесе оның тарихи жадын қорлауды мақсат етпегендерін мәлімдеді.
ЭФИР БАРЫСЫНДА НЕ БОЛДЫ
Оқиға блогер Пан Васильмен стрим барысында болды. Әңгіме барысында қыздар Кенесары хан және оның сүйегі тақырыбын қозғады.
Студент қыздардың бірі қырғыздар ханның басын бермейтінін, өйткені «жауларға бас бермеу керек» деп айтты. Эфирде Кенесары ханның бас сүйегінен оның рухын қорлау үшін «шарап ішеді» деген сөз де айтылды.
СТУДЕНТ ҚЫЗДАР ҚАЛАЙ ЖАУАП БЕРДІ
Кейінірек Бішкектен келген студент қыздардың қазір Астанада алмасу бағдарламасы бойынша оқитыны белгілі болды. Жазба таралып, сын толқыны басталғаннан кейін Аруке мен Эдина бейнеүндеу жазып, қазақстандықтардан кешірім сұрады. Олар қазақ халқын кемсітуді немесе оны қаралауды мақсат етпегендерін мәлімдеп, бұдан былай мұндай сөздер айтпауға уәде берді.
Студент қыздар сондай-ақ қырғыз халқынан, мұғалімдері мен ата-аналарынан кешірім сұрады. Олардың айтуынша, эфир барысында блогер оларға провокациялық сұрақтар қойған, алайда олар бұл айтылған сөздерді ақтамайтынын мойындады.
КОНТЕКСТ
Кенесары хан туралы мәлімдемелер тақырыбы бұған дейін де әлеуметтік желілерде резонанс тудырған. 2025 жылдың қаңтарында қазақстандық AIRAN YouTube-арнасы жариялаған қырғызстандық әнші Қайрат Примбердиевпен сұхбатында Кенесары ханның қазасы және қазақтар мен қырғыздар арасындағы қарым-қатынас талқыланды. Жарияланымнан кейін әншінің сөздері қоғамдық пікірталас тудырды.
2025 жылдың ақпанында Қырғызстанның Мемлекеттік ұлттық қауіпсіздік комитеті (МҰҚК) Примбердиевке қатысты нәсілдік, этникалық, ұлттық және діни алауыздық туралы бап бойынша қылмыстық іс қозғалғанын хабарлады. Оған сондай-ақ тергеу және процестік әрекеттер жүргізілу кезеңінде елден шығуға шектеу қойылды.
2025 жылдың наурызында Бішкектің Бірінші мамыр аудандық соты Примбердиевті кінәлі деп танып, оған 100 мың сом мөлшерінде айыппұл тағайындады.
