Абай облысында сот әкімшілік қателік салдарынан тұрғын үй кезегінен шығарылған жетім баланың тұрғын үй құқығын қалпына келтірді. Бұзушылық аумақтық өзгерістерден кейін орын алып, тек сот тәртібімен жойылды.
ДЕРЕКТЕРДІҢ ЖОҒАЛУЫ ҚАЛАЙ БОЛДЫ
Кәмелетке толмаған К. тәрбиеленушісінің мүддесіндегі талап арызды Арнайы әлеуметтік қызметтерді қажет ететін балаларды қолдау орталығы берді, деп хабарлайды соттардың баспасөз қызметі. Бала жетімдер санатына жатқызылып, бұрын тұрғын үйге мұқтаж ретінде есепке қойылған болатын.
Абай облысындағы әкімшілік-аумақтық өзгерістерден кейін жаңадан құрылған ауданда кезекшілер тізімін жасау кезінде ол туралы мәліметтер жоғалған. Іс материалдарында бұл баланың немесе оның заңды өкілдерінің кінәсінен болғаны көрсетілмеген.
БҰЗУШЫЛЫҚҚА КІМ ЖОЛ БЕРДІ
Сот Жаңасемей ауданының тұрғын үй-коммуналдық шаруашылық бөлімі және Семей қаласының тұрғын үй қатынастары және тұрғын үй инспекциясы бөлімі мамандарының міндеттерін тиісінше орындамағанын анықтады.
Олардың әрекеттері кәмелетке толмағанның тұрғын үй кезегін сақтау құқығының бұзылуына әкелді.
СОТ ШЕШІМІ ЖӘНЕ ОНЫҢ ОРЫНДАЛУЫ
Сот талап арызды қанағаттандырып, лауазымды тұлғалардың әрекеттерін заңсыз деп таныды. «Отбасы Банк» тұрғын үй құрылыс жинақ банкі orken.otbasybank.kz ақпараттық жүйесіне К.-ның 2016 жылдан бастап тұрғын үй есебіне қойылғаны туралы жоғалған мәліметтерді қалпына келтіріп, енгізуге міндеттелді.
Сот шешімі заңды күшіне енгеннен кейін банк бір ай ішінде баланы «Жетім балалар, ата-анасының қамқорлығынсыз қалған балалар» санаты бойынша кезекке қайта қалпына келтірді.